السلام عليكم ورحمة الله وبركاته :- 

جبتلكوا أفكار لتعليم الحروف الابجدية سواء انجليزى أو عربى للاطفال من عمر تلات سنوات ... جمعتها من مدونات عربية وانجليزية ... يارب تعجبكم 

فى البداية لازم نفهم ان طريقة المنتيسورى بعيدة كل البعد عن التلقين .. ازاى ؟ 
يعنى الطفل بيتعلم بكل حواسه .. يعنى مش هيعرف ان " أ" " أرنب " الا لما يشوف الارنب ويلون صورته ويعلقها على الحيطة  ويشوف كل الحاجات اللى حواليه اللى بتبدأ ب " أ" ... ودلوقت اسيبكوا مع الأفكار :- 

دى الحروف الابجدية زى ماانتوا شايفين ... بتتعمل بورق الصنفرة  ( الحرف بس بورق الصنفرة ومحطوط على سطع ناعم املس ) لان الطفل بيتحسسها بصوابعه وده بيساعده أكتر على حفظ شكل الحرف وبيدربه على كتابة الحرف بطريقة غير مباشرة ... وهنا الطفل بيضم اصبعى السبابة والوسطى ويمرر بيهم على الحرف ودى من أشهر طرق المنتيسورى لتعليم الحروف 

وفى الطريقة دى بنعلم الطفل صوت الحرف مش اسم الحرف .. علشان تتعرفوا اكتر على الاسلوب شوفو الفيديو ده 

                             أما تانى طريقة من طرق المنتيسورى هى الرسم على الرمل .. ( ممكن نستخدم الملح ) وده بيتيح للطفل فرصة انه يحفظ اكتر شكل الحرف ويقلد اتجهاته .. وطبعا مننساش متعة الطفل :)


ونحاول مع كل حرف الطفل بيتعلمه نوريله حاجات كتييييييييييير بتبتدى بالحرف ده ... وده مش بس بالصور لا كمان بالمجسمات ... ياريت نحطها كلها على حاجة ونبدأ ننطق كل مجسم ببطء قدام الطفل زى الصور اللى تحت من مدونة د/ دعاء مجدى 

لاحظو ان الحرف لازم يكون قدام المجسمات علشان نربط الاشياء بالحرف  



وطبعا من الحاجات المفيدة جدا فى تعليم الحروف للاطفال ان يكون كل حرف مرتبط بشكل معين بيبدأ بيه الحرف والصور هتوضح .... الام بتعمله مع الطفل وبيعلقوه فى غرفة الطفل وده بيشجع الطفل أكتر على التعلم 













ممكن تطبعو الحروف وتخلو الطفل يلونها من الرابط ده 
http://www.education.com/slideshow/color-animal-alphabet/Color_Letter_K/


فيه كمان افكار اكتر زى ان الطفل يعمل الحرف بالصلصال ... او انه يمشى على الحرف بألوان ماية او الوان زيت 



                              



ممكن كمان نزين الحرف بالبرونز او الاستيكر او الخرز ومتنسوش تعلقوه فى غرفة الطفل 


                                                                                                        





ممكن كمان نشترى قطاعات البسكوت ونعمل مع الطفل بسكوت بشكل الحروف ^_^ او نزين الحرف بالمكرونة ونلزقها بالصمغ 

        




                   

اعملى صندوق صغير وحطى فيه مجموعة من الصور ... لكل حرف صورة بتبدأ بيه .. وخلى طفلك يطابق الصورة مع الحرف بتاعها ... وجيبى صورة شكل واكتبى حروف الشكل تحته وخلى طفلك يطابق الحروف مع بعضها وانتى طبعا فى ده كله هتقوليله الكلمة او احرف ببطء مع التكرار

                                               




فيه كمان مجموعة العاب بالحروف غير كدة ... زى مثلا ممكن تدفنى الحروف فى رمل او رز كتييييييير وتطلبى من طفلك ان يطلع الحروف وكل حرف يطلعه يقول عليه ... ويقول كلمة تبدأبيه .....
أو ترسموا مع بعض الحرف بخط كبييييييير على الارض وتخليه يمشى عليه بأى لعبة .....
أو تلعبو لعبة الحروف الموسيقية زى لعبة الكراسى الموسيقية كدة  ( الطفل بيمشى مع الموسيقى على الحروف اللى على الارض واول ما الموسيقى تخلص الام تقول على حرف معين وعلى الطفل انه يروح يقف على الحرف ده بسرعة ..... طبعا مع الطفل اللى لسة بادىء يتعلم الحروف ممكن نرسمله بس تلات او اربع حروف
أو تلزقى الحروف المغناطيسية على لوحة كبيرة وتطلبى من طفلك انه يطابق الحروف 

          

    
ممكن كمان تعملوا كتاب وتلزقوا فيه اى حاجة بتلاقوها عند الحرف بتاعها فى الكتاب .... والفكرة دى معمولة فى كتب جاهزة وبتتباع فى أمريكا بالفعل 

    بس هى فكرتها سهلة جداااااا يبقى ليه نشتريها من برة لما ممكن تتعمل فى البيت والطفل هو اللى يلزق الصورة فى مكانها الصحيح 




وده موقع ممكن تدخلو عليه وتطبعوا الحروف بالانشطة بتاعتها وتلزقوها مع بعض 

http://www.themeasuredmom.com/dot-sticker-pages/


وده app كويس جدا لتعليم الحروف مع رسم الطفل الحرف بصباعه .. 

وعندكوا على ال youtube فى سلسلة تعليمية اسمها " ببغاء يتعلم الهجاء " لذيذة جدا .. لكل حرف قصة بالكرتون 
وفيه منهج ال Jolly phonics أكتر من راااااااائع لتلعيم الحروف اللانجليزى بشكل مختلف فعلا .. لكل حرف صوت و حركة معينة بالايد  اغنية وشكل من الاشكال .. 
دول أطفال بيمثلوا الحروف .. هم حافظين مع كل حرف الحركة بتاعته .. وهتلاقو اغانى الحروف على ال youtube بردو 

أتمنى تكونوا استفادتو .. ومستنية تطبيقاتكوا مع أولادكم .. متنسوش تبعاتولنا اللى عملتوه :)  واستنوا التدوينات القادمة .... دمتم فى رعاية الله