الالكترونيات وأثرها على الطفل

أرجوووووووكى يا بنت الحلال بلااااش التابلت والموبايل

 والتليفزيون لابنك أو بنتك .. خطر جدا على الطفل .. علشان

 مترجعيش تشتكى وتقولى ابنى مبيقعدش خمس دقايق

على بعض فى المذاكرة .. أو مش عاوز يمسك القلم ويكتب

 .. أو بنتى مبتركزش خالص .. أو بتزهق بسرعة

كل وسائل التكنولوجيا بتعمل مشاكل فرط الحركة وتشتت

 الانتباه .. ومبتعلمش الطفل أى حاجة مفيدة حتى لو كان 

بيتفرج على برامج تعليمية .. لأن الطفل أساسا بيتعلم عن 

طريق الإحتكاك المباشر من شخص .. وبيتعلم بإستخدام

إيديه .. يعنى لازم إيديهتشتغل علشان دماغه تنمو وتتطور

 وإدراكه يعلى

كمان الوسائل دى غلط لانها بتأخر الطفل لغويا .. إللى مفكر

 ان ممكن ابنه يتعلم لغة بإنه يقعده قدام برنامج انجليزى

 مثلا فيتعلم انجليزى .. الكلام ده أتثبت انه غلط والطفل

 مبيتعلمش غير بالإحتكاك المباشر يعنى شخص قدامه لازم

 هو إللى يتكلم معاه باللغة دى فتقوم دماغه تلقط إشارات

 اللغة دى .. الكلام ده ينطبق على اللغة الأم للطفل الصغير

إللى بيتأخر فى الكلام لازم الأم تكلمه كتير وجها لوجه

كمان بتأخر الطفل اجتماعيا لان الطفل لازم يحتك مع أطفال

 تانين وناس كبار ومامته وباباه علشان يتعرض لمواقف

 ويستفيد منها..

فيه أنشطة كتيرة جدا دلوقت بتبعد الطفل عن الحاجات

 إللى 

بتضره دى .. بحث بسيط على جوجل هيطلعلك كتير .. غير

 الصفحات والمدونات إللى مبقاش فيه أكتر منها دلوقت ...

 لو مكسلة اعملى أبسط الحاجات زى التلوين والرسم

واللعب بالمكعبات وأى فكرة تلاقيها بسيطة ... صدقينى ده

 هيفرق كتييييييير فى تنمية ذكاء ابنك

إللى عاوزة تريح دماغها من وش العيال وعاوزه تلهيه فى

 أى

حاجة علشان تقعد على الفيس ولا تكلم صحابها ولا تروح

 تعمل أى حاجة عاوزاها .. تعتبر انى مقلتش حاجة 😀😀

أنشطة حمزة ويحيى من عمر سنة الى سنة ونص ( الجزء التانى )

السلام عليكم .. كنت عملت تدوينة سابقة عن أنشطة حمزة ويحيى من سن عام الى عام ونص الجزء الاول ... وده الجزء التانى ان شاء الله 

أولا : الصلصال .. مهم جدااااااااا للأطفال فى سن ما قبل المدرسة عموما لانه بيقوى عضلات الايد الدقيقة اللى هتساعده بعد كدة فى مسك القلم والكتابة ان شاء الله 
عملنا كذا نشاط بالصلصال منهم .. ادخال أعواد فيه .. أو ادخال الاعواد فى أنابيب بعد تثبيتها فى الصلصال ... الصلصال طبعا منزلى لان سنهم لسة صغير وساعات يحبوا يدوقوه ^_^ 
وصفة الصلصال : كوب دقيق / نص كوب ملح / تلات أرباع كوب ماء / لون طعام

وده نشاط  بالكور .. طبعا باين فى الصورة انه محتاج مطابقى للألوان .. أنا بس عملت الالوان كلفت انتباه مش أكتر ليهم لانهم لسة سنهم صغير على المطابقة ... النشاط ده اتكرر بكذا صيغة بمعنى كل ما ألاقى كارتونة أعمل فيها فتحة وأخليهم يدخلوا فيها الكور 

أما النشاط ده معروف طبعا :) ..بالكور بردو ... ادخال الكور فى الفتحات .. الحاجات دى طبعا مفضلتش ملزوقة على الحيطة لانهم أكيد وقعوها ^_^ فبقوا ياخدوا الانبوبة فى ايد ويدخلوا الكرة بالايد التانية فده كان أسهلهم

وده نشاط فتح وغلق العلب .. طبعا علب سهلة الفتح . والصعوبة بتزيد كل ما الطفل كبر .. النشاط ده ممتع وبينمى عندهم روح الاستكشاف لان الطفل بيبقى عاوز يفتح ويستكشف ايه اللى جوة كل علبة 

ودى كرات فوم صغيرة .. المطلوب منهم انهم يحطوها فى مكعبات التلج دى ... النشاط ده بردوا بيقوى عضلات الايد الدقيقة والتركيز 

ودى استيكرات لزقتها على صينية . وهم ما عليهم غير انهم يحاولوا يطلعوها من مكانها .. 

أما عن الانشطة الابداعية .. فكان ده من أحلى الحاجات ... دى حاجة اسمها slime  مادة لزجة .. أنا سميتها وصفة بديلة للصلصال العادى .. لان الاطفال الصغيرين الصلصال العادى بيبقى جامد على ايديهم .. وده كمان فيه حبوب . فبتزود احساس الطفل بالمادة وبتخليها ممتعة ... دع عبارة عن ( كوبين من النشا وكوب ماية ونص كوب حاجة اسمها tapoica pearls  أو حبات الماية هتلقوها بتتباع فى قسم الدقيق ... لو مش متوفرة ممكن تحطوا أى حبوب عندكوا  وأخيرا لون طعام )

وأخيرا . النزهات الخارجية زى ما نوهت عن أهميتها فى الجزء الاول  ... كان يها نصيب كبير .. اهتميت بان يبقى ليهم أنشطة برة البيت أو خروج للحديقة بس يتفرجوا على الاشجار و الورود ويلعبوا فى الخضرة براحتهم 

الى هنا تنتهى تدوينة اليوم .. يارب تكونوا استفدتوا .. تابعونا على صفحة الفيس بوك للمزيد من الانشطة .. دمتم فى رعاية الله وحفظه